31/08/2026
میری ایک فی میل دوست نے مشورہ مانگا ہے ۔۔
ہماری شادی کو سات سال ہو چکے ہیں۔ شادی کے بعد صرف ایک ہفتہ ہماری ازدواجی زندگی معمول کے مطابق رہی، لیکن اس کے بعد میرے شوہر نے اچانک اپنا کمرہ الگ کر لیا۔ میں نے بارہا ان سے پوچھا کہ آخر مسئلہ کیا ہے اور کیا مجھ سے کوئی غلطی ہوئی ہے، مگر انہوں نے کبھی کوئی وجہ نہیں بتائی۔
نہ میرے شوہر کا کسی سے کوئی تعلق ہے اور نہ ہی میرا کوئی ماضی رہا ہے۔ ہماری شادی بچپن سے طے تھی، لیکن مختلف شہروں میں رہنے کی وجہ سے شادی سے پہلے نہ ہماری ملاقات ہوئی اور نہ ہی بات چیت۔
شادی کے ایک ہفتے بعد ایک دن میرے شوہر کافی دیر تک اپنی والدہ کے کمرے میں اپنی والدہ اور بہن کے ساتھ موجود رہے۔ اس کے بعد جب وہ باہر آئے تو انہوں نے مجھ سے الگ کمرہ اختیار کر لیا۔ آج تک وہ اپنے اس رویے کی کوئی وجہ نہیں بتاتے۔ سات سال گزر جانے کے باوجود نہ انہوں نے مجھے کوئی وضاحت دی اور نہ ہی ہمارے درمیان ازدواجی تعلق دوبارہ قائم ہوا۔
میں نے اپنی ساس اور نند سے بھی کئی بار بات کی، ان سے درخواست کی کہ اگر مجھ سے کوئی غلطی ہوئی ہے تو مجھے بتا دیں تاکہ میں اپنی اصلاح کر سکوں۔ لیکن وہ ہمیشہ یہی کہتی ہیں کہ "ہمارا بیٹا جو کر رہا ہے، بالکل صحیح کر رہا ہے، تم اسی لائق ہو۔" مگر اس کے باوجود وہ کبھی یہ نہیں بتاتیں کہ آخر میری غلطی کیا ہے یا مجھ میں ایسی کون سی بات ہے جس کی وجہ سے میرے شوہر نے مجھ سے یہ رویہ اختیار کیا۔
میں نے بہت صبر کیا، سمجھنے کی کوشش کی، یہاں تک کہ منت سماجت بھی کی، لیکن آج تک مجھے کوئی جواب نہیں ملا۔ میرے شوہر گھر کے تمام اخراجات پورے کرتے ہیں، لیکن ہمارے درمیان میاں بیوی والا کوئی تعلق نہیں ہے۔ ہم ایک ہی گھر میں رہتے ہیں مگر اجنبیوں کی طرح زندگی گزار رہے ہیں۔
میری والدہ اس دنیا میں نہیں ہیں اور میرے والد نے دوسری شادی کر لی ہے۔ جب میں نے اپنے والد سے اس بارے میں بات کی تو انہوں نے بھی یہی کہا کہ "جیسے بھی حالات ہیں، اپنے شوہر کے گھر میں رہو۔" اس وجہ سے میرے پاس نہ کوئی سہارا ہے اور نہ ہی کوئی ایسا شخص جو میری بات سن کر میرے مسئلے کا حل نکالنے میں مدد کرے۔
آج ہماری شادی کو سات سال گزر چکے ہیں۔ میرے شوہر مالی ذمہ داریاں تو نبھا رہے ہیں اور میں بھی اپنے تمام فرائض ادا کر رہی ہوں، لیکن سات سال سے ہمارے درمیان کوئی ازدواجی تعلق نہیں ہے اور نہ ہی اس صورتحال کی کوئی وجہ مجھے بتائی گئی ہے۔
میرا سوال یہ ہے کہ کیا اسلام کی رو سے ہمارا نکاح اب بھی برقرار اور معتبر ہے، جبکہ سات سال سے ہمارے درمیان کوئی ازدواجی تعلق قائم نہیں ہوا؟ اور ایسی صورتحال میں شریعت مجھے کیا حقوق اور کیا راستہ فراہم کرتی ہے؟
