18/07/2026
றொபர்ட் நொக்ஸின் பதிவுகளில் கதிர்காமம்
கண்டி மன்னன் இரண்டாம் இராஜசிங்கன் ஆட்சிக் காலத்தில் (1658) இலங்கைக்கு வந்து பின்னர் சிறைப்பட்டிருந்த ஆங்கிலேயரான றொபர்ட் நொக்ஸ் (Robert Knox), தனது புகழ்பெற்ற A Historical Relation of Ceylon (1681) என்னும் நூலில் கதிர்காமத்தைப் பற்றிய பல குறிப்பிடத்தக்க தகவல்களைப் பதிவு செய்துள்ளார். அவரது குறிப்புகள், 17ஆம் நூற்றாண்டில் கதிர்காமத்தின் சமய, பண்பாட்டு மற்றும் அரசியல் முக்கியத்துவத்தை வெளிப்படுத்தும் சமகால வெளிநாட்டு ஆதாரங்களுள் ஒன்றாகக் கருதப்படுகின்றன.
நொக்ஸின் பதிவின்படி, இலங்கையின் தென்கிழக்குப் பகுதி இயற்கையாகவே மனிதக் குடியேற்றத்திற்கும் போக்குவரத்திற்கும் கடினமான நிலப்பரப்பாக விளங்கியது. இதனை விளக்கும்போது, “இலங்கையின் கிழக்குக் கரை தெற்கே செல்லச் செல்ல, கப்பல்கள் கரையிறங்குவதற்கு மிகவும் கடினமானதாகவும், நிலவழியாகச் செல்வதற்குச் செங்குத்தான மலைச்சரிவுகள் நிறைந்ததாகவும் உள்ளது. மனித வாழ்வுக்கும் சுகமான குடியேற்றத்திற்கும் ஏற்ற இடமல்ல. இந்த நிலை, அங்கு அமைந்துள்ள கதிர்காமத் தெய்வத்தின் ஆணையாலேயே ஏற்பட்டது என அப்பகுதி மக்கள் நம்புகின்றனர்” என்று குறிப்பிடுகிறார். இக்குறிப்பு, கதிர்காமம் ஒரு சாதாரண வழிபாட்டுத் தலமாக அல்லாது, தெய்வீக ஆற்றல் நிறைந்த புனித மையமாக மக்களால் கருதப்பட்டதைக் காட்டுகிறது.
மேலும், உப்பளங்களுக்குச் செல்லும் பயணிகள் கதிர்காமத் தெய்வத்திற்கு காணிக்கை செலுத்துவது வழக்கமாக இருந்ததையும், “போர்த்துக்கேயருக்கும் ஒல்லாந்தருக்கும் ஆதரவளித்தவர்கள்கூட கதிர்காம சுவாமியின் விஷயத்தில் மிகுந்த மரியாதையுடனும் அச்சத்துடனும் நடந்துகொண்டனர். அந்நியப் படையினர் கதிர்காமத்திற்குச் செல்லும் வழியைக் கேட்டாலும், மக்கள் அதைச் சொல்ல மறுத்தனர்” என்றும் நொக்ஸ் பதிவு செய்கிறார். இது கதிர்காமம் மத மையமாக மட்டுமன்றி, உள்ளூர் மக்களால் இரகசியமாகவும் பாதுகாப்புடனும் பேணப்பட்ட புனிதத் தலமாக இருந்ததையும் உணர்த்துகிறது.
வேடர் சமூகத்தைப் பற்றிய அவரது குறிப்புகள் மேலும் முக்கியத்துவம் பெறுகின்றன. வேடர்கள் கதிர்காமத் தெய்வத்தின் உருவத்தைக் கூட சித்திரமாக வரைந்து காட்டக் கூட அஞ்சியதுடன், எவ்வளவு வற்புறுத்தப்பட்டாலும் கதிர்காமத்திற்குச் செல்லும் பாதையை வாய்மொழியிலோ கைச்சைகையிலோ கூட வெளிப்படுத்த மறுத்தனர் என நொக்ஸ் பதிவு செய்கிறார். இக்குறிப்பு, கதிர்காம வழிபாட்டில் வேடர் சமூகத்தின் பாரம்பரியப் பங்கையும், அத்தலத்துடன் அவர்களுக்கிருந்த ஆழமான ஆன்மீகத் தொடர்பையும் வெளிப்படுத்துகிறது.
பின்னர், கண்டி இராச்சியம் ஆங்கிலேயர் ஆட்சிக்குட்பட்டதைத் தொடர்ந்து கதிர்காமத்தைப் பார்வையிட்ட டாக்டர் ஜோன் டேவி (Dr. John Davy), தனது An Account of the Interior of Ceylon (1821) என்னும் நூலில், “மூலவிக்கிரகம் மிகவும் விலையுயர்ந்ததும் புனிதமானதுமானதால், அதை காட்டின் எங்கோ பாதுகாப்பாக மறைத்துவிட்டனர். கோயிலில் தெய்வத்தின் ஆயுதங்கள் மட்டுமே ஒரு பெட்டகத்தில் வைத்து வழிபடுகின்றனர்” என்று பதிவு செய்கிறார். அரசியல் குழப்பங்களின் காலங்களில் மூலவிக்கிரகங்களை பாதுகாப்பான இடங்களுக்கு மாற்றி வைத்த மரபுடன் இக்குறிப்பு ஒத்துப்போகிறது.
எனவே, றொபர்ட் நொக்ஸும் ஜோன் டேவியும் பதிவு செய்துள்ள குறிப்புகள், 17–19ஆம் நூற்றாண்டுகளில் கதிர்காமம் பல இனங்களும் பல சமய மரபுகளும் சந்தித்த புனிதத் தலமாக விளங்கியதையும், அதன் வழிபாட்டு மரபுகள், மூலவிக்கிரகம் மற்றும் இரகசியச் சடங்குகள் உள்ளூர் மக்களால் மிகுந்த பக்தியுடனும் பாதுகாப்புடனும் பேணப்பட்டதையும் சுட்டிக்காட்டும் முக்கியமான வரலாற்றுச் சான்றுகளாக அமைகின்றன.
இத்தகைய பலதரப்பட்ட வரலாற்று இரகசியங்கள் நிறைந்த ஆதியான கதிர்காமத்தான் இன்று கொடியேற்றம் காண்கிறான்… ♥️
ஆடிவேல் திருவிழா | கதிர்காமம் குறிப்புகள்.
#நகல்
