Coa información recollida montouse un monólogo teatral protagonizado por un afiador, o espectáculo ¡Furga Garabela!. Esta peza escrita e dirixida por X.H.Rivadulla Corcón e interpretada por Pepe Penabade, foi representada en 40 ocasións, en distintos lugares de Galiza e da Península. Todo o material elaborado para esta montaxe sería reunido no libro ¡Furga Garabela! No ano 2002, tratando de levar
o personaxe do afiador ao seu espazo natural (a rúa) a compañía estrea o espectáculo Rodesindo da Barrosa, dirixido por X.H. Rivadulla Corcón e interpretado por Pepe Penabade. Con este espectáculo ten realizado máis de 120 funcións por Galiza e o resto do Estado, e segue a ser representado con éxito. En 2003, co obxecto de chamar a atención sobre a problemática medioambiental e as súas consecuencias na economía e na forma de vida mariñeiras, a compañía monta Salitre, peza escrita e dirixida por X.H. Rivadulla Corcón e interpretada por Comba Campoy e Pepe Penabade. Chegaría a representarse en 30 ocasións. Do mesmo xeito que co anterior espectáculo, o texto desta obra foi publicado pola editorial Sotelo Blanco. No 2004 Volta e Dálle estrea o espectáculo de rúa Peccata Minuta, escrito e dirixido por Lucho Penabade e interpretado por Comba Campoy e Pepe Penabade. En clave satírica, a peza amosa o percorrido dun bispo da Idade Media polas rúas da vila cun confesionario móbil, buscando almas ás que confesar. A compañía leva realizadas con este espectáculo máis de 30 funcións en feiras e festas medievais. O mesmo ano a compañía coproduce con Produccións Dedentro o espectáculo
Jalisia ¡Mi Madriña!, escrito e dirixido por Nazaret López e interpretado por Comba Campoy e Pepe Penabade. A viaxe dun moteiro rural e unha rapaza urbanita e ecoloxista con inquedanzas existenciais conseguiu xerar a identificación dun público moi variado, tal e como se puido comprobar ao longo das súas 40 funcións. No ano 2007 a compañía acada unha axuda da AGADIC para a produción de PAN (Catro propostas arredor da malla), un espectáculo de catro actos escritos e dirixidos por Nazaret López, Carlos Santiago, Lucho Penabade e Rivadulla Corcón, respectivamente, e coa dirección coreográfica de Branca Novoneyra. Con este espectáculo, a compañía afonda no seu achegamento ao problema da morte do rural, desde a ollada de cada un dos autores e xogando con distintas linguaxes escénicas. Cinco actores en escena (Pepe Penabade, María Lado, Alfonso Romeu, Luis Iglesia e Comba Campoy) e os músicos Mini e Mero, que interpretan distintas pezas en directo, fixeron de PAN un espectáculo que percorreu con éxito o país ao longo de máis de 40 actuacións en teatros e prazas galegas. Unha vez máis, o video e o texto do espectáculo tiveron a súa plasmación nun libro-DVD editado por Sotelo Blanco.
